असोज २४ गतेबाट विराजको ‘१२ गाउँ’ पनि रिलिज हुने

अन्ततः नायक तथा निर्देशक विराज भट्टले फिल्म ‘१२ गाउँ’को प्रदर्शन दिन तोकेका छन् । यसअघि दशैंमा फिल्म रिलिज गर्ने बताए पनि कुन दिनबाट रिलिज गर्ने भन्ने विषयमा विराज बोलेका थिएनन् ।

तर, मंगलबार बेलुकी एक पोस्टर सार्वजनिक गर्दै उनले असोजको २४ गते अर्थात् फूलपातिबाट फिल्म रिलिज गर्ने घोषणा गरेका हुन् । 

विराजले नेपाली फिल्मलाई अन्तराष्ट्रिय बजारमा पुर्याउने उद्देश्यसहित आफूहरूले यो फिल्ममा निकै मिहिनेत गरेको पनि उल्लेख गरेका छन् । 

यो फिल्मबाट विराजका छोरा समीर भट्टले फिल्म क्षेत्रमा डेब्यू गर्दैछन् । सार्वजनिक पोष्टरमा समीरको एक्सन अवतार देख्न सकिन्छ । साथमा फिल्ममा विराज भट्ट, न्यान्सी खड्का, सनिसा भट्टराई लगायतका कलाकारहरूको अभिनय छ । 

फिल्मको टिजर केही दिनमा रिलिज गर्ने तयारी समेत निर्माणपक्षको छ । विराजको फिल्म पनि फूलपातीमा आउने भएपछि यो मितिमा ३ वटा  फिल्म रिलिज हुने पक्का भएको छ । यसअघि यो मितिमा ‘छक्का पन्जा ५ र ज्वाइँ साब’ रिलिजको मिति तोकिसकिएको छ ।