‘खुस्मा’को टिजरमा धिरज र उपासनाको प्रेम

फिल्म ‘खुस्मा’को टिजर सार्वजनिक भएको छ । मुख्य नायक धिरज मगर र नायिका उपासना सिंह ठकुरीको प्रेमको वरिपरी घुमेको यो टिजरले तत्कालीन नेकपा माओवादीको द्धन्द्धका कारण गाउँमा परेको प्रभावलाई पनि प्रस्तुत गरेको छ ।

एम मिडिया प्रालीको ब्यानरमा निर्माण भएको यो फिल्ममा अशोक थापा मगरको लेखन तथा निर्देशन छ । यो फिल्ममा वीर बहादुर लामा, चन्द्र बहादुर भट्टचन र बेतान मगरको लगानी छ ।

मान बहादुर धनाह मगर र सुस्मिता बुढाथोकी सह–निर्माता रहेको फिल्मका कार्यकारी निर्माता मोहन राई हुन् । दीपक बज्राचार्यको छायांकन रहेको यो फिल्ममा खड्कबहादुर पुन, सुजाता राई, विजय सुब्बा, राज थापा काउचा, अस्तित्व भट्टचन, संगीता थापा मगर, सारा राई, अरुन मगर, श्वेता मिश्र, विवेश मगर लगायतका कलाकारहरुको अभिनय छ ।

मगर समुदायको परिवेशमा निर्माण भएको यो फिल्मले जनयुद्धको प्रभावका बीच फक्रिएको प्रेमलाई पर्दामा देखाएको छ । असोजको ३ गतेबाट रिलिजमा आउन लागेको यो फिल्ममा एसडी योगी र छान्जु पार्कको संगीत छ ।