फूलपातीमा ‘१२ गाउँ’, ‘छक्का पन्जा ५’ र ‘जोकर २’

यो बर्षको दशैंको फूलपातीमा नेपाली र विदेशी फिल्मबीच चर्को भिडन्त हुने देखिएको छ । फूलपातीमा अहिलेसम्म फिल्म ‘छक्का पन्जा ५’ले प्रदर्शन मिति तोकिसकेको छ । अन्य, फिल्मले भने दशैं मात्र भनेपनि दिन तोकेका छैनन् । 

वुझिएअनुसार, दशैंको फूलपातीमा फिल्म ‘१२ गाउँ’ पनि ल्याउने तयारी भइरहेको छ । विराज भट्टको निर्देशनमा तयार भएको यो फिल्ममा समीर भट्ट, न्यान्सी खड्का, सनिसा भट्टराई लगायतका कलाकारको अभिनय छ । फिल्ममा विराज भट्ट नै मुख्य भूमिकामा छन् ।

फिल्मको दुई वटा पोस्टर सार्वजनिक गरिसकेको निर्माणपक्षले अब केही दिनमै टिजर सार्वजनिक गर्ने तयारी गरेको छ । विराजले फिल्मको टिजर आएपछि दर्शकले यसको मेकिङ र कथावस्तु कस्तो छ भनेर थाहा पाउने बताउँदै आएका छन् । यसपटक, विराजले फिल्मको हरेक पाटोलाई उत्कृष्ट बनाउन कुनै कसर बाँकी नराखेको वुझिएको छ । यसैले, यो फिल्मले दशैंमा ‘छक्का पन्जा ५’लाई चुनौती दिने देखिन्छ । 

विशेषश्रोतका अनुसार, दशैंमा ‘पूर्ण बहादुरको सारङ्गी र उनको स्विटर’ मध्ये एउटा फिल्म रिलिज गर्ने तयारी पनि गरिएको छ तर, यसको आधिकारिक पुष्टि भने भइसकेको छ । 

यता, हलिउडका चर्चित फिल्म ‘जोकर’को सिक्वेल ‘जोकर २’लाई पनि दशैंमा नै रिलिज गर्ने तयारी गरिएको छ । एप्पल इन्टरटेन्मेन्टले यो फिल्मलाई फूलपातीमा रिलिज गर्ने गरी तयारी थालेको वुझिएको छ ।

यो बाहेक एउटा साउथ र एउटा बलिउड फिल्म पनि दशैंमा रिलिज हुँदैछन् । अब, वितरकले यी दुबै फिल्मलाई नेपाल भित्र्याउँछन् या भित्र्याउँदैनन् हेर्न बाँकी छ । यसपटकको दशैंको फूलपातीमा बक्स अफिसमा चर्को भिडन्त हुने देखिन्छ । 

यसअघि ‘छड्के २’ कमजोर बन्दा ‘छक्का पन्जा ४’लाई सहज भएको थियो । तर, यसपटक भने बलिया फिल्मसँग ‘छक्का पन्जा ५’ले प्रतिस्पर्धा गर्नुपर्ने देखिएको छ ।