हमालले ‘नरसिंहाः अवतार’बाट कमब्याक गर्दै

निर्देशक दिवाकर भट्टराईले निर्देशन गर्न लागेको फिल्मको नाम ‘नरसिंहाः अवतार’ राखिएको छ । निर्माणपक्षले फिल्मको नामको घोषणा गरेसँगै थिम पोस्टर पनि सार्वजनिक गरेको छ । थिम पोस्टरले युद्धको संकेत गरेको छ । थिम पोस्टर हेर्दा फिल्मले युद्ध र शान्तिको कथा भन्ने संकेत गरेको छ । 
नरसिंहाको अर्थ भगवान विष्णुको उग्र अवतार हो । शान्तिका लागि द्धन्द्ध हुने  थिम पोस्टरले संकेत गरेसँगै यो फिल्म एक्सन प्रधान हुने अनुमान लगाउन सकिन्छ । 

यही फिल्मबाट नायक राजेश हमाल ८ बर्षपछि फिल्म क्षेत्रमा कमब्याक गर्दैछन् । हमाल यो फिल्मलाई लिएर उत्साहित छन् । फिल्मको केन्द्रीय भूमिकामा हमालको भूमिका रहनेछ । फिल्ममा नायक राज कटुवालको पनि मुख्य भूमिका रहनेछ । 

क्रियटिभ सिने आर्ट्सको ब्यानरमा निर्माण हुन लागेको यो फिल्मको अन्य प्राविधिक र कलाकारको बिषयमा केही पनि जानकारी दिइएको छैन । फिल्ममा तीन करोड भन्दा माथिको लगानी रहने बताइएको छ ।