‘बुलाकी’को ट्रेलरमा जारी प्रथाको कथा

साउनको ३२ गतेबाट रिलिजमा आउन लागेको फिल्म ‘बुलाकी’को नयाँ ट्रेलर रिलिज गरिएको छ । सोमबार काठमाडौंमा आयोजित पत्रकार सम्मेलनमा निर्माण कम्पनी छत्रेश्वरी म्यानेजमेन्ट प्रा.लीले ट्रेलर सार्वजनिक गरेको हो ।

सार्वजनिक ट्रेलरमा कर्णाली तथा सुदुरपश्चिम क्षेत्रमा विद्यमान जारीप्रथाको कथालाई यथार्थ रुपमा चित्रण गरिएको छ । यो फिल्मको मुख्य भूमिकामा सुरक्षा पन्त, नरेन खड्का र विराज बिष्ट छन् ।

राजबहादुर सानेको कथा र लक्ष्मण सुनारको निर्देशनमा तयार भएको यो फिल्मको बिषयमा नायिका सुरक्षा पन्तले भनिन्–‘लड्ने मान्छे हिड्दा मात्र सफलता संभव हुन्छ । बुलाकीको दोस्रो इनिङ पनि सफल हुनेमा विश्वस्त छौं ।’ शिव ढकालको छायांकन रहेको यो फिल्ममा लक्ष्मी गिरी, सुशील पोखरेल, रमेश वुढाथोकी, कुलद्धिप अधिकारी लगायतका कलाकारको अभिनय छ । 

गतबर्षको बैशाख १ गते रिलिजमा आएको यो फिल्मलाई शोज कम पाएको भन्दै दुई दिनमै हलबाट उतारिएको थियो । सोही समयमा निर्माणपक्षले अर्को मितिमा दर्शकमाझ रिलिज गर्ने घोषणा गरेको थियो । यो फिल्मले थुप्रै अवार्डहरु समेत जितिसकेको छ ।