‘होस्टेल ३’मा केदारका छोराको इन्ट्री, फागुन १६ बाट रिलिज हुने

भदौको २१ गतेबाट छायांकनमा जान लागेको फिल्म ‘होस्टेल ३’को प्रदर्शन मिति तय गरिएको छ । यो फिल्मलाई आगामी फागुनको १६ गतेबाट विश्वभर रिलिज गर्ने घोषणा यसको निर्माणपक्षले गरेको छ ।

यो फिल्ममा पारस बम, रिहान गिरी, पदम तामाङ, सिम्रन पन्त लगायतका कलाकारको अभिनय रहने पक्का भइसकेको छ । अब, यो फिल्ममा कलाकार केदार घिमिरेका छोरा आशिष घिमिरेको पनि प्रवेश भएको छ ।

होस्टेलमा बसेर अध्ययन गर्ने युवायुवतीको कथामा यो फिल्म बन्न लागेको हो । फिल्ममा हेना नगरकोटीको पनि अभिनय रहने पक्का भएको छ । सशान कँडेलको निर्देशनमा तयार हुन लागेको यो फिल्मको हाल धमाधम प्रि–प्रोडक्शनको काम चलिरहेको छ ।

माधव शर्माको स्क्रिप्ट रहेको फिल्मलाई सम्मान इन्टरटेन्मेन्टले आरोन कन फिल्मसँगको सहकार्यमा निर्माण गर्न लागेको हो । शंकर कोइराला कार्यकारी निर्माता रहेको फिल्मका निर्माताहरू कर्ण कार्की र गोविन्द अधिकारी हुन् । फिल्ममा सुधा महरठ्ठा, सुरेश कँडेल र अर्जुन सापकोटा सह–निर्माताको रुपमा छन् ।