‘देवी’ टिजरः बलात्कारको विरुद्धमा सशक्त आवाज

भदौको २१ गतेबाट रिलिजमा आउन लागेको फिल्म ‘देवी’को टिजर सार्वजनिक भएको छ । यो फिल्मले विशेषगरी, समाजमा बढ्दो बलात्कारको घटनाको विरुद्धमा बोल्छ । बलात्कार जस्तो जगन्य अपराधमा पनि कानुनले पार्ने प्रभाव र त्यसले निम्त्याउने परिणामको कथामा फिल्म बनेको छ ।

यो फिल्मको टिजर हेर्दा यसले केही बर्ष अगाडि सुदुरपश्चिममा घटेको नाबालिका निर्मला पन्तको बलात्कारपछिको हत्याको घटनालाई उठान गरेको वुझ्न सकिन्छ । क्राइम थ्रिलर जनरामा निर्माण भएको यो फिल्मलाई संजोग राईले निर्देशन गरेका हुन् ।

फिल्मको कथा निर्देशक राईले अजय गौतमसँग मिलेर लेखेका हुन् । एक्जिबिटी स्टुडियोको प्रस्तुतिमा निर्माण भएको यो फिल्ममा बाँसुरी फिल्मस्ले पनि सहकार्य गरेको छ । फिल्ममा शिल्पा मास्के, गौरव पहारी, नाजिर हुसेन, टीका पहारी, प्रभाकर न्यौपाने, ध्रुव कोइराला, निरिक्षा घतानी, विशाल पहारी, निरु खड्का, जीवन जंग खड्का र विकास पन्तको अभिनय छ ।

सन्जेन थापाको एक्सन रहेको फिल्ममा रेमन गुरुङ, नारायण राई र संजोग राइको लगानी छ । जावेद खान कार्यकारी निर्माता रहेको फिल्ममा उजेन नोर्वे गुरुङ र मिलन लामा सह–निर्माता, जोएल फ्रोमलेको छायांकन छ । निर्देशक राई र अजय गौतमको फिल्ममा पटकथा छ ।