अब पल साथमा छन्, रुनु पर्दैनः पूजा शर्मा

नायक पूजा शर्माले आफ्नो साथमा अब पल शाह भएकाले रुन नपर्ने बताएकी छिन् । भदौको २१ गतेबाट रिलिजमा आउन लागेको फिल्म ‘रावायण’को टिजर रिलिज कार्यक्रममा निर्मात्री समेत रहेकी पूजाले पलको खुलेरै तारिफ गरिन् ।

उनले, पल शाह आफूलाई मनपर्ने नायक भएको तर्क गरिन् । साथै, उनले आफूलाई मनपर्ने नायिका प्रियंका कार्कीको पनि यो फिल्ममा साथ रहेको भन्दै खुशी व्यक्त गरिन् । 

उसो भए यसअघिका फिल्म रोएर चलाउनु भएको हो भन्ने पत्रकारको प्रश्नमा पूजाले गलत तरिकाले नवुझिदिन आग्रह गरिन् । उनले भनिन्–‘त्यो बुझाई गलत हो । हिजो पल साथमा नहुँदाको परिस्थिति र आज उनी साथमा हुँदाको अवस्थाको बारेमा मैले भन्न खोजेकी हुँ । रोएर फिल्म चल्छ भन्ने खोजेकी होइन ।’

पूजाले पलसँगको झगडाको बारेमा पनि मुख खोलिन् । उनले, आफ्नो नजिकको मान्छेसँग नै झगडा पर्ने तर्क गरिन् । नायक पल शाहले पनि एउटै सिरानी गरेर सुत्दा खुट्टा लाग्ने बताए । उनले, यो फिल्मका लागि निकै मिहिनेत गरेको बताउँदै दर्शकले साथ दिनेमा विश्वास व्यक्त गरे । 

यो फिल्ममा पल दोहोरो भूमिकामा छन् । फिल्ममा आफू ‘कान्छा र राघव’को भूमिकामा देखिएको पलको भनाई छ ।