१८ करोड लगानीमा सामाखुशीमा खुल्यो नयाँ हल

काठमाडौंको सामाखुसीमा रहेको सिटी स्क्वायर मलमा क्यूएफएक्सको नयाँ चेन संचालनमा आएको छ । बिहिबार बेलुकी कलाकारहरू किरण केसी, दीपकराज गिरी, रमेश उप्रेती, जितु नेपाल, निर्मल शर्मा, गायक प्रकाश सपुत, गायिका नीति शाहले संयुक्त रुपमा हलको उद्घाटन गरेका थिए । तीन वटा पर्दा रहेको यो हलमा ४ सय ९७ सिट छ ।

सिटी स्क्वायर मलको नवौं तल्लामा यो हल खुलेको छ । यस्तै, हरेक पर्दामा सोफा सेट सहित सुतेर समेत फिल्म हेर्ने सिटहरु जडान गरिएको छ ।

यो हलका सबै थिएटरमा पिक्चर र साउन्ड क्वालिटीलाई उच्च प्राथमिकतामा राख्दै एसियाकै सर्वोत्कृष्ट साउन्ड एरोम्याक्स वाइ बार्को र दक्षिण एसियाकै सिरिज फोर बार्को लेजर प्रोजेक्सन प्रविधि जडान गरिएको हलका संचालक सुमित मैनालीले जानकारी दिए । हल उद्घाटनमा पुगेका कलाकर्मीहरुले साउन्ड क्वालिटी र प्रोजेक्सनको खुलेरै तारिफ गरेका थिए ।

१८ करोड लगानीमा यो हल संचालनमा आएको हो । हल उद्घाटन समारोहमा नायक प्रदीप खड्का पनि पुगेका थिए । सुमितले यसअघि राइजिङ मलमा पनि क्यूएफएक्स क्यूज हल संचालनमा ल्याइसकेका छन् ।