‘१२ गाउँ’को पोष्टरमा विराज र समीरको एक्सन अवतार

नायक विराज भट्टको निर्देशनमा तयार भएको  फिल्म ‘१२ गाउँ’को नयाँ क्यारेक्टर पोष्टर रिलिज भएको छ । सार्वजनिक पोष्टरमा नायक विराज भट्ट र उनका छोरा समीर भट्टलाई देख्न सकिन्छ । पोष्टरमा यी दुबैको एक्सन अवतार देख्न सकिन्छ । सार्वजनिक पोष्टरमा टिजर चाडै नै सार्वजनिक गर्न लागिएको जानकारी समेत दिइएको छ । 

यही फिल्मबाट विराजका छोरा समीरले फिल्म क्षेत्रमा प्रवेश गरेका हुन् । यो फिल्ममा दुबै नायकको एक्सन अवतार  प्रस्तुत गरेपनि भूमिका के हो भन्ने खुलेको छैन । 

विराजले फिल्म ‘साङ्लो’पछि यो फिल्मको निर्देशन गरेका हुन् । यो फिल्ममा सनिषा भट्टराई, न्यान्सी खड्का लगायतका कलाकारको पनि अभिनय छ । 

यो फिल्मलाई दशैंमा रिलिज गर्ने बताइएको छ  । तर, दशैंमा कुन दिनबाट फिल्म रिलिज हुने हो भन्ने खुलाइएको छैन । 

फिल्मको छायांकन नेपाल  र मुम्बइमा गरिएको हो । विराजले यो फिल्मले नेपाली फिल्म क्षेत्रलाई एक्सनको नयाँ गोरेटोमा लैजाने दाबी गर्दै आएका छन् ।