के नरेनलाई फिल्म क्षेत्रले चिन्न नसकेको हो ?

नायक नरेन खड्का अभिनित फिल्म ‘बुलाकी’ साउनको ३२ गतेबाट पुनः रिलिजमा आउँदैछ । यो फिल्म गतबर्ष पनि २ दिन मात्र चलेको थियो । शो कम पाएको भन्दै फिल्मको निर्माणपक्षले हलबाट उतारेको थियो । 

फिल्म फेरि प्रदर्शनमा आउँदै गर्दा यसको निर्माणपक्षले नयाँ गीत थपेको छ । साथमा, अनावश्यक दृश्यहरु हटाइएको पनि छ । 

यो फिल्ममा सुरक्षा पन्त र विराज बिष्ट  पनि मुख्य भूमिकामा छन् । फिल्म हेरेका अधिकांशले नायक नरेन खड्काको प्रशंसा पनि गरेका छन् । 

उसो त फिल्म क्षेत्रमा नरेन पछि परेका छन् । काम राम्रो गरेपनि उनलाई फिल्म क्षेत्रले चिन्न नसकेको टिप्पणी हुने गर्दछ । केही समय अगाडि आयोजित एक कार्यक्रममा पनि निर्देशक तथा कलाकार दिनेश डीसीले नरेन फिल्म क्षेत्रमा नोटिस किन हुन सकेनन् भनेर प्रश्न गरेका थिए । 

फिल्म ‘बुलाकी’बाट पनि नरेनले राम्रो तारिफ पाएका छन् । यसैले, नरेनको प्रतिभालाई फिल्म क्षेत्रले चिन्न आवश्यक देखिएको छ ।