सरोज खनाल भन्छन्–‘नेपाली फिल्म क्षेत्रमा गुटबन्दी छ’

नेपाली फिल्म क्षेत्रका चर्चित कलाकार सरोज खनालले नेपाली फिल्म क्षेत्रमा गुटबन्दी रहेको आरोप लगाएका छन् । 

फिल्म ‘नम्बरी सुन’को ट्रेलर रिलिज कार्यक्रममा बोल्दै सरोजले भने–‘नेपाली फिल्म क्षेत्रमा गुटबन्दी छ । केही निर्देशकले, केही प्रोडक्शन कम्पनीले केही कलाकारसँग मात्र काम गर्ने चलन चल्दै आएको छ । यसैले, हाम्रो हातमा त जस्ता जस्ता फिल्म पर्छन्, ती फिल्मलाई न्याय दिने कोशिश गर्ने हो ।’

सरोजले समय परिवर्तन हुने भन्दै सधैं एउटै भूमिका खोजेर नहुने बताए । उनले भने–‘म पहिले हिरो खेल्थेँ, अहिले पनि सोही भूमिका खेल्छु भनेर हुँदैन । समय अनुसार जस्तो भूमिका आउँछ, त्यही अनुसार काम गर्छु ।’

सरोजले नेपाली फिल्म क्षेत्रमा गुटबन्दी बढेको भन्दै घुमाउरो शैलीमा असन्तुष्टि जनाएका छन् । साथै, आफू जस्ता कलाकारहरूले आज राम्रो टिममा काम पाउन गाह्रो भएको उनको तर्क थियो । 

सरोजले अभिनय गरेको फिल्म ‘नम्बरी सुन’ साउनको २५ गतेबाट रिलिजमा आउँदैछ । यो फिल्मको कथावस्तु राम्रो भएको उनको भनाई छ ।