नीतिको हातमा फिल्म नै फिल्म, साइन गरिन् ‘मोहर’

यो बर्षको वैशाख महिनामा नायिका नीति शाहको डेब्यू फिल्म ‘खजुरे ब्रो’ रिलिज भयो । यो फिल्म बक्स अफिसमा चलेन । यो फिल्म नचलेपछि नीतिको करिअर अब के होला भन्ने प्रश्नहरू पनि उठे ।

तर, यो फिल्म असफलताले नीतिलाई केही पनि फरक परेको छैन । उनको हातमा फिल्मको लाइनअप लामो बनेको छ । 

नीतिले नयाँ फिल्म ‘मोहर’ साइन गरेकी छिन् । ओम प्रतिकले निर्देशन गर्न लागेको फिल्म नीतिले साइन गरेकी हुन् । 

फिल्म मेकर्स प्रा.लिको प्रस्तुतिमा तयार हुन लागेको यो फिल्ममा ओम प्रतिककै लेखन छ । फिल्मलाई चुम्बन जंग शाहीले निर्माण गर्न लागेका हुन् । निर्माणपक्षले फिल्मको बारेमा अरु केही पनि बताएको छैन । 

नीतिले हालै मात्र फिल्म ‘ज्वाइँ साब’को छायांकन सकाएकी छिन् । एउटा गीत बाँकी राखेर यसको निर्माणपक्षले छायांकन सकिएको जानकारी दिएको छ । 

नीतिको हातमा फिल्म ‘रुखान’ पनि छ । सविर श्रेष्ठको निर्देशनमा बन्ने यो फिल्मको छायांकन चाँडै सुरु गर्ने योजना निर्माणपक्षको छ । 

नीतिले निर्देशक दिवाकर भट्टराइको निर्देशनमा बन्न लागेको अनटाइटल प्रोजेक्ट पनि साइन गरेकी छिन् । यस्तै, नीतिले अर्को एक नाम चलेको ब्यानरको फिल्म पनि साइन गरेको वुझिएको छ । यो बिषयमा नीतिले केही पनि बताएकी छैनन् । 

यसरीहेर्दा, नीतिको हातमा फिल्मको लाइनअप बलियो देखिएको छ । पहिलो फिल्म असफल भएपनि नीति फिल्म क्षेत्रमा सर्वाधिक माग भएकी नायिका बनिरहेकी छिन् ।