‘घरज्वाइँ’ चल्दा दंग छन् दया र मिरुना

शुक्रबारदेखि रिलिजमा आएको फिल्म ‘घरज्वाइँ’ले अनपेक्षित व्यापार गरिरहेको छ । शुक्रबार र शनिबार नै सुखद व्यापार गरेको यो फिल्मले मंगलबार र बुधबार पनि राम्रो कमाई गर्यो । फिल्मका वितरक रोहित कट्टेलले पनि फिल्मले उत्साहजनक व्यापार गरिरहेको उल्लेख गरेका छन् । 

दर्शकसँग साक्षात्कार गर्न फिल्म चलेको दोस्रो दिन हलमा पुगेका मुख्य कलाकारद्वय दयाहाङ राई र मिरुना मगर बुधबार पनि हलमा पुगे । दया अर्को फिल्मको वर्कसपमा व्यस्त भएकाले केही दिन हल पुग्न पाएका थिएनन् ।

तर, दर्शकको उत्साहजनक उपस्थितिका कारण दया र मिरुना काठमाडौंका केही हल पुगे । उनीहरुले, फिल्म रिलिज हुँदा केही डर लागेको तर अहिले दर्शकको मायाले खुशी लागेको बताए । दयाले भने–‘राजनीतिक परिवर्तन र बाढी पहिरोका कारण फिल्मको व्यापारमा असर गर्छ कि जस्तो लागेको थियो । तर, दर्शकले साथ दिनुभएको छ । निकै खुशी छु ।’

दयाको यो बर्ष ४ वटा फिल्म रिलिज भइसकेका छन् । यी चारै वटा फिल्म बक्स अफिसमा असफल भने भएका छैनन् । ‘डिग्री माइला, मनसरा, गाउँ आएको बाटो’ले ठूलो व्यापार नगरे पनि निर्मातालाई पीडा भने दिएनन् । फिल्म ‘घरज्वाइँ’ पनि निर्मातालाई राहत दिने दौडमा छ । 

जनक घर्ती मगरले यो फिल्मको निर्माण गरेका हुन् ।