४५ दिनमा सकियो प्रदीप र दिव्याको ‘एक्टर’को छायांकन

फिल्म ‘एक्टर’को छायांकन सकिएको निर्माणपक्षले जानकारी दिएको छ । पोखरामा १० दिन र काठमाडौंमा ३५ दिन खिचेर फिल्मको छायांकन सकिएको हो । अब, फिल्मको एक गीतको छायांकन युरोपमा गर्ने तयारी निर्माणपक्षको छ । 

फिल्मका निर्माता थमन कुमार भण्डारीले नायक प्रदीप खड्कालाई यस अगाडि दर्शकले जुन रुपमा हेर्दै आउनु भएको थियो, त्यो भन्दा विल्कुलै फरक अवतारमा ‘एक्टर’मा हेर्न पाउनुहुनेछ ।

राजन भुसालको डेब्यू निर्देशनमा तयार भएको यो फिल्ममा प्रदीप खड्का, दिव्या रायमाझी, राजवल्लभ कोइराला, आना शर्मा, सुशील सिटौला, दिव्य देव, उषा रजक, प्रदीप चौधरी लगायतका कलाकारको अभिनय छ । यो दिव्याको डेब्यू फिल्म हो ।

अदृत फिल्मस्को प्रस्तुतिमा मोती फिल्मस्को निर्माण रहेको यो फिल्ममा थमन कुमार भण्डारीको लगानी छ । एनिस भुसाल सह–निर्माता रहेको फिल्मका क्रियटिभ प्रोड्युसर मोती कार्की हुन् ।

नरेन्द्र मैनालीको छायांकन रहेको यो फिल्म कार्तिकको १५ गतेबाट रिलिजमा आउँदैछ । फिल्मको जापान रिलिज अधिकार समेत विक्री भएको निर्माणपक्षले बताएको छ । खेम राज शाहको म्याक्स इन्टरटेन्मेन्टले यो फिल्मको जापान प्रदर्शन अधिकार खरिद गरेको हो ।