‘कार्साङ’को वर्कशपमा दया, छायांकनको तयारी

फिल्म ‘कार्साङ’को वर्कशपमा नायक दयाहाङ राई जोडिएका छन् । कलाकार र प्राविधिक टिमको उपस्थितिमा वर्कशप भइरहेको हो । यार्सा फिल्मस् र पुरुषोत्तम प्रधान फिल्मस्को प्रस्तुतिमा निर्माण हुन लागेको यो फिल्मको छायांकन यसै साता  सुरु हुने निर्माणपक्षले बताएको छ ।

फिल्मका मुख्य नायक दयाहाङ राई वर्कशपमा जोडिएसँगै निर्माण टिमले छायांकनको तयारी समेत सुरु गरेको हो । सामाजिक कथावस्तुमा निर्माण हुन लागेको यो फिल्ममा दयाको साथमा श्रृजना निङ्लेकु, जितु नेपाल, दिया मास्के, वुद्दि तामाङ, छिरिङ शेर्पा, सरिता गिरी लगायतका कलाकारको अभिनय रहनेछ ।

यम शेर्पाको निर्देशनमा तयार हुन लागेको फिल्ममा पुरुषोत्तम प्रधानको निर्माण र छायांकन रहनेछ । फिल्ममा निर्देशक शेर्पाकै कथा, पटकथा तथा संवाद छ ।

गोविन्द बोहरा सह–निर्माता रहेको फिल्ममा आङ छिरिङ शेर्पा कार्यकारी निर्माता र वीरेन्द्र शाही लाइन प्रोड्युसर छन् । फिल्मको बाह्रबिसे नगरपालिका र भोटेकोसी गाउँपालिकाका विभिन्न स्थानमा छायांकन गरिनेछ ।