नीताको पहिलो यात्रामा रेखाको साथ

नायिका नीता ढुंगानाले फिल्म ‘मितिनी’मा बाल–कलाकारको रुपमा काम गरिन् । यो फिल्ममा नीताले बाल कलाकारको रुपमा काम गर्दा नायिकाको रुपमा भने रेखा थापाले काम गरेकी थिइन् । नीताको फिल्मी करिअरको पहिलो यात्रामा रेखा थापाले साथ दिएकी थिइन् । 

उनै, नीताले निर्मात्री बनेर  काम गरिरहेको पहिलो फिल्म ‘ह्रस्व दीर्घ’को हाल धमाधम छायांकन भइरहेको छ  । यो फिल्मका लागि नीताले तीन बर्ष समय बिताइसकेकी छिन् । फिल्मलाई असोजको ३ गतेबाट रिलिज गर्ने तयारी छ । 

निर्मात्रीको रुपमा पहिलो यात्रा थालेकी नीतालाई यसपटक पनि  रेखाले साथ दिएकी छिन् । रेखाले यो फिल्ममा विशेष भूमिकामा काम गरेकी छिन् । 
रेखाले यो फिल्ममा काम गरेपछि नीता लेख्छिन्–‘मेरो करिअरको सुरुवाती दिनमा तिमी थियौं दिदी । अहिले पहिलो पटक निर्माता बनेर फिल्म बनाउँदा तिमीलाई कसरी नसम्झिनु । धन्यवाद यो साथ र मायाका लागि ।’

चन्द्र पन्तको निर्देशनमा छायांकन भइरहेको यो फिल्ममा नीतालाई पुराना नायिकाहरु विपना थापा, संचिता  लुइटेलले पनि साथ दिएका छन् ।