के यी फ्लप फिल्मका सिक्वेल बन्लान् त ?

गतबर्ष रिलिजमा आएका केही फिल्मका मेकरले सिक्वेल बनाउने घोषणा पनि गरे । फिल्मको अन्तिममा सिक्वेल बनाउने छनक दिँदै नयाँ कलाकारलाई इन्ट्री पनि गरे । तर, ती फिल्म अब बन्छन् या बन्दैनन् पक्का छैन । 

फिल्म ‘हात्तीछाप’को पोस्ट क्रेडिटमा कलाकार दीपकराज गिरीको इन्ट्री गराउँदै ‘हात्तीछाप २’ बनाउने घोषणा गरियो । बक्स अफिसमा यो फिल्म सुपर फ्लप भयो । अब, निर्माता किरण नेपालीले यो फिल्मको सिक्वेल बनाउँछन् या बनाउँदैनन् पक्का छैन । तर, उनले फिल्मको क्रेडिटमै दीपकराज गिरीले काम गर्ने घोषणा गरेका थिए । 

गतबर्ष नै रिलिजमा आएको फिल्म ‘रंगेली’को अन्तिममा पनि नायक आर्यन सिग्देललाई इन्ट्री गराइयो । अर्जुन सुवेदीको निर्देशनमा बनेको यो फिल्म पनि बक्स अफिसमा सुपर फ्लप भयो ।

आर्यनलाई ‘एनीमल’का नायक रणवीर कपुरको स्टाइलमा प्रस्तुत गर्दै अर्जुनले यसको सिक्वेल बनाउने घोषणा गरे । तर, अब यो फिल्मको सिक्वेल बन्छ या बन्दैन पक्का छैन । किनकी, यो फिल्म हिट भएको भए निर्माणपक्षले सिक्वेलको सुरसार गरिसकेको हुन्थ्यो । तर, फ्लप भएपछि अर्जुन अर्कै नाममा फिल्म बनाउने दौडमा छन् । 

यो बर्षको असार ७ गतेबाट रिलिजमा आएको फिल्म ‘दान्भी’ पनि बक्स अफिसमा असफल भयो । यो फिल्मको अन्तिममा पनि सिक्वेल बनाउने घोषणा गरिएको छ । तर, यो फिल्म बक्स अफिसमा नचलेपछि निर्माणपक्षलाई सिक्वेल बनाउन भने समस्या देखिएको छ । 

नायिका पूजा शर्मालाई केन्द्रीय भूमिकामा देखाउँदै निर्माण भएको फिल्मले दर्शकको मन नजितेपछि निर्माणपक्षले सिक्वेल बनाउँछ या बनाउँदैन हेर्न बाँकी छ । उसो त, फिल्म असफल हुने वित्तिकै सिक्वेल बनाउने घोषणा गरिए पनि त्यस्ता फिल्म नबनेको उदाहरण प्रशस्त छ ।