‘घरज्वाइँ’को ‘यानीमाया’ रिलिज

असारको २८ गतेबाट रिलिजमा आउन लागेको फिल्म ‘घरज्वाइँ’को दोस्रो गीत ‘यानीमाया’ सार्वजनिक भएको छ । अनिल बुढा मगरको निर्देशनमा तयार भएको यो फिल्मको गीतमा मुख्य कलाकारहरू नायक दयाहाङ राई र नायिका मिरुना मगर फिचरिङ छन् । 

सार्वजनिक गीतमा हर्क साउदको शब्द र मनोज थापाको संगीत तथा स्वर छ । फिल्मको दृष्य भाषा र क्यारेक्टरको हिँडाई बोलाइलाई समेत फिल्मको यही गीतको थिममा नै राखेर प्रस्तुत गरिएको छ । 

जीएम मुभिज र एबीएम फिल्म प्रोडक्शनको ब्यानरमा निर्माण भएको फिल्मलाई सुसन प्रजापतिले खिचेका हुन् । पूर्वी रुकुममा खिचिएको फिल्ममा निर्देशक अनिलकै कथा छ । पटकथा तथा संवाद लेखनमा उनलाई विनोद खतिवडा र सुभाष कोइरालाले साथ दिएका छन् । 

जनक घर्ती मगरको निर्माणमा तयार भएको यो फिल्ममा दया र मिरुनाको अलवा वुद्दि तामाङ, पुष्कर गुरुङ, शिशिर वाङ्देल, भोलाराज सापकोटा, खड्कबहादुर पुन लगायतका कलाकारको अभिनय छ । फिल्ममा हर्क साउद र मनोज थापा मगरको शब्द तथा  संगीत छ ।