गीत खिचिएसँगै सकियो ‘यो मन त मेरो नेपाली हो’को छायांकन

फिल्म ‘यो मन त मेरो नेपाली हो’को सम्पूर्ण छायांकन सकिएको निर्माणपक्षले जनाएको छ । ‘आँखै रसिलो’ बोलको गीतको छायांकन सकिए लगतै फिल्मको सम्पूर्ण छायांकन सकिएको हो । यो गीतमा दीपक शर्माको शब्द तथा संगीत, अस्मिता अधिकारी र सबिन सुवेदीको स्वर छ ।

गीतको भिडियोलाई कविराज गहतराजले कोरियोग्राफी गरेका हुन् । गीतको भिडियोमा कलाकारहरू रोशन श्रेष्ठ, आयुषा समालले नृत्य गरेका छन् ।

साथमा, ‘मेरो डान्स यूनिभर्स’की विजेता खुशी कार्की, नारायण प्रधान, डी आइडीका टप टेन डान्सर नरेश वीर सिंहलाई फिचरिङ गरिएको छ ।

फिल्मको केही साता अगाडि अमेरिकामा समेत छायांकन गरिएको थियो । यो फिल्मको छायांकन नेपालको झापा, इलामका साथै भारतको सिक्किम, दार्जिलिङ, जय गाउँ लगायतका ठाउँमा गरिएको छ । साथै, फिल्मको छायांकन मलेसिया, पोल्याण्ड, अष्ट्रिया, बेल्जियम, ट्यूनिसिया, जर्मनी, साउथ, अफ्रिका लगायतका देशका कलाकारहरूको पनि अभिनय छ ।

मित्र प्रधानको निर्देशन रहेको यो फिल्ममा ज्ञान बहादुर प्रधानको निर्माण छ । फिल्ममा रोशन श्रेष्ठ, विल्सन विक्रम राई, वुद्दि तामाङ, विजय बराल, आयुषा समाल, नारायण खाती, भूपेन्द्र लिङ्देन, सुवास भण्डारी लगायतका कलाकारको अभिनय छ ।