भदौ २१ मा शिल्पाको ‘देवी’ रिलिज हुने

फिल्म ‘देवी’ भदौको २१ गतेबाट रिलिज हुने भएको छ । आज फिल्मको फस्टलुक सार्वजनिक गर्दै यसको निर्माणपक्षले प्रदर्शन मिति तय गरेको हो ।
यो फिल्मलाई संजोग राईले निर्देशन गरेका हुन् ।

फिल्ममा रेमन गुरुङ, नारायण राई र संजोग राइको लगानी छ । उजेन नोर्वे गुरुङ, मिलन लामा सह–निर्माता रहेको यो फिल्ममा जोइल फ्रोमको छायांकन छ । 

सन्तोष दवाडीको सम्पादन रहेको फिल्ममा जावेद खान कार्यकारी निर्माताको रुपमा छन् । अजय गौतम र संजोग राइको यो फिल्ममा पटकथा छ । 

फिल्म ‘देवी’को पोस्टरबाट यसले विद्रोहको कथा भन्न खोजेको अनुमान लगाउन सकिन्छ । फिल्ममा शिल्पाको गेटअपले पनि उनको भूमिकाले दर्शकलाई सरप्राइज दिन्छ कि भन्ने अड्कल लगाउन सकिन्छ । 

फिल्म ‘परस्त्री’मा शिल्पाले गरेको अभिनयको निकै तारिफ भएको थियो । अब, उनको यो फिल्मले पनि उनलाई नयाँ उचाई दिने विश्वास गर्न सकिन्छ ।