दुई स्टारसँग सफलता कुरिरहेकी आना

नायिका आना शर्मा लामो समयदेखि सफलता कुरिरहेकी छिन् । फिल्म ‘जेरी’मा काम गरेपछि उनले पाएको सफलता अहिले कमजोर बनेको छ । उनले काम गरेका केही फिल्मले दर्शकको साथ नपाउँदा उनको करिअर पनि अलमलमा पर्यो । 

तर, अब भने आनाको करिअर ब्याउन्स ब्याक हुने संभावना छ । किनकी, उनी नेपाली फिल्म क्षेत्रका दुई स्टार नायकहरूसँग काम गर्दैछिन् । 

आना नायक प्रदीप खड्कासँग फिल्म ‘एक्टर’मा काम गरिरहेकी छिन् । यो फिल्मको छायांकन सुरु भएको केही साता भयो । फिल्मलाई कार्तिकमा रिलिज गर्ने तयारी निर्माणपक्षको छ । फिल्म ‘पुजार सार्की’ चलेपछि उत्साहित भएका नायक प्रदीप खड्काका लागि यो फिल्म विशेष छ । प्रदीप र आनाको जोडी पनि दर्शकका लागि प्रतीक्षामा रहनेछ । 

अब, केही दिनमा नै आना नायक अनमोल केसीसँग फिल्म ‘जेरी अन टप’मा काम गर्दैछिन् । यो फिल्ममा अनमोल केसी, आना शर्मा र आँचल शर्मा फाइनल भइसकेका छन् ।

निर्देशक सुयोग गुरुङको निर्देशनमा तयार हुन लागेको यो फिल्म त्रिकोणात्मक प्रेमकथामा आधारित छ । अनमोलसँग ‘जेरी’मा काम गरेपछि आनाको करिअर उचाइमा पुगेको थियो । अब, उनी फेरि दर्शकमाझ अनमोलसँग नै पर्दामा देखिदैछिन् । 

आनाले साइन गरेका केही फिल्मको निर्माण नै भएन । जसलेगर्दा, उनलाई घाटा लाग्यो । तर, अब भने उनी अनमोल र प्रदीपसँग पर्दा शेयर गर्दै सफलता पर्खिरहेकी छिन् ।