‘गाउँ आएको बाटो’को ‘राई माईला’ गीत सार्वजनिक

नवीन सुब्बाको निर्देशनमा तयार भएको फिल्म ‘गाउँ आएको बाटो’को पहिलो गीत ‘राई माईला’ सार्वजनिक गरिएको छ । श्रवण मुकारुङको शब्द, कालीप्रसाद बास्कोटाको संगीत तथा सुनिता थेगिमको स्वर छ । यो गीतको भिडियोमा फिल्मका मुख्य कलाकारहरू दयाहाङ राई, पशुपति राई, प्रसन राइलाई फिचरिङ गरिएको छ । 

सार्वजनिक गीतको दृश्यमा फिल्मको कथासार प्रस्तुत गरिएको छ । यो फिल्मले बाबु र छोराको कथा भन्छ । बाबु र छोराको सम्बन्धको कथालाई यो फिल्मले सूक्ष्म रुपमा प्रस्तुत गरेको छ । गाउँमा सडकसँगै स्मार्ट फोन, सन ग्लास, टेलिभिजन, हिपहप संगीतले गाउँको मानवीय सम्बन्ध र सोचाइमा ल्याउने परिवर्तनको कथा भन्छ ।

जेठको २५ गतेबाट रिलिजमा आउने फिल्मले २० वटा भन्दा बढी प्रतिष्ठित अन्तराष्ट्रिय महोत्सवहरुमा सहभागिता जनाइसकेको छ । मेन्छयाम पिक्चर्सर बाँसुरी फिल्मस्को संयुक्त ब्यानरमा निर्माण भएको यो फिल्ममा अमोद राई र निर्देशक नबिन सुब्बाको लगानी छ । महेश राईले नबिन सुब्बासँग मिलेर फिल्मको कथा लेखेका हुन् ।