‘फर्की फर्की र पुजार सार्की’को कलेक्शन कति ?

रिलिजको नवौं दिनमा प्रवेश गरिसक्दा पनि फिल्म ‘फर्की फर्की र पुजार सार्की’का निर्माताले कलेक्शन सार्वजनिक गरेका छैनन् । दुबै फिल्मका  निर्माताले आफूहरुले बनाएको फिल्म आक्रामक रुपमा चलिरहेको दाबी गरेका छन् । 

तर, दुबै फिल्मका निर्माता कलेक्शन सार्वजनिक गर्न भने आनाकानी गरिरहेका छन् । दुबैले एक अर्काको बाटो हेरिरहेको प्रस्ट हुन्छ । 

जेठको १० गतेबाट रिलिजमा आएका यी दुई फिल्मले दर्शक हलमा फर्काएका छन् । अझ, हलमा फर्किएका दर्शकलाई यी दुई फिल्मले जोगाएका छन् । 

तर, फिल्मको व्यापारको शैली हेर्दा दुबै फिल्मको व्यापारमा खासै फरक नभएको प्रस्ट छ । काठमाडौं, चितवन, पोखरामा यी दुबै फिल्म आक्रामक छन् । पुर्वमा ‘फर्की फर्की’ केही माथि देखिएको छ भने पश्चिमका केही हलमा ‘पुजार सार्की’ माथि देखिएको छ । यसैले, यी दुबै फिल्मको व्यापारमा ठूलो भिन्नता नभएको आँकलन गर्न सकिन्छ । 

स्टारडमको कुरा गर्दा यसपटक दुबै फिल्मका स्टार चलेका छन् । ‘फर्की फर्की’बाट नायक अनमोल केसीले आफ्नो स्टारडम पुष्टि गरेका छन् । यता, ‘पुजार सार्की’बाट प्रदिप खड्का, पल शाह लगायतका नयाँ पुस्ताका स्टारहरुले आफ्नो स्टारडम पुष्टि गरेका छन् । 

तर, दुबै फिल्मका मेकरले एक अर्कासँग जुध्दा केही करोड घाटा लागेको बाहिरी रुपमा स्विकार त गरेका छैनन्, तर आन्तरिक रुपमा यो कुरा महशुश गरेका छन् । यी दुबै फिल्म एक अर्कासँग नजुधेको भए व्यापारिक आँकडा अझै माथि हुने पक्का थियो ।