वर्षाको छलाङ्ग

नायिका वर्षा सिवाकोटीले फिल्म ‘छक्का पन्जा ५’ साइन गरेर सबैलाई सरप्राइज दिइन् । उनले, यो फिल्म केही दिन अगाडि नै साइन गरेपनि निर्माणपक्षको आग्रहमा कसैलाई पनि शेयर गरेकी थिइनन् । तर, बिहिबार बिहानै यसको निर्माणपक्षले पोस्टरसहित वर्षा फिल्ममा रहेको जानकारी दियो । 

उसो त दीपकराज गिरी र उनको टिमले हरेक फिल्ममा नयाँ नयाँ नायिकाहरूलाई अनुबन्धित गर्दै आइरहेको छ । यो टिममा नीता ढुंगाना, प्रियंका कार्की, वर्षा राउत, नम्रता सापकोटा, स्वस्तिमा खड्का, दीपिका प्रसाँई, केकी अधिकारी, बेनिशा हमाल लगायतका नायिकाले काम गरिसकेका छन् । 

अब, ‘छक्का पन्जा ५’बाट नायिका वर्षा सिवाकोटीले ब्लकबस्टर टिममा प्रवेश गरेकी छिन् । यो फिल्म वर्षाका लागि महत्वपूर्ण छ । किनकी, करिअर सुरुवात गरेदेखि नै वर्षाको फिल्मी यात्रा उचाइमा पुग्न सकेको छैन । उनले, निरन्तर काम त पाइरहेकी छिन् तर अपेक्षित सफलता पाइसकेकी छैनन् ।

यसैले, यो फिल्म उनका लागि करिअरकै कोशेढुंगा बन्ने निश्चित छ । 

वर्षाको यो बर्ष फिल्म ‘मोदीबेनी’ पनि रिलिज हुँदैछ । उनले ‘झिल्को र काजी’ पनि साइन गरिसकेकी छिन् । यसरीहेर्दा, उनको करिअर सही तरिकाले अगाडि बढेको विश्लेषण गर्न सकिन्छ । 

उनका लागि ‘छक्का पन्जा ५’ ठूलो अवसर हो । यो अवसरलाई उनले सदुपयोग गर्न सकिन् भने करिअरमा उनले राम्रै छलाङ मार्न सक्नेछिन् ।