अन्जना बराइलीः ‘प्रिमियर नायिकादेखि प्यारी नायिका’सम्म

फिल्म ‘महापुरुष’मा काम गरेपछि अन्जना बराइलीले चर्चा पाइन् । यो फिल्मको सफलताले उनी दंग त परिन् । तर, यसपछि भने उनको हातमा फिल्म खासै अफर आएन । उनले फिल्म ‘चित्रा’मा काम गरेपनि त्यसले उनलाई फाइदा दिएन । बरु, यो फिल्मको प्रचारमा नै उनी देखिइनन् । 

अन्जनाले फिल्म ‘महापुरुष’मा काम गरेपछि आफूलाई अन्य फिल्मको प्रिमियरमा खुबै व्यस्त बनाइन् । निम्तो आएका अधिकांश फिल्मको प्रिमियरमा उनी पुग्न थालिन् । सो समयमा उनलाई ‘प्रिमियरमा पुग्ने नायिका’ भनेर मिडियाले चित्रित गरेको थियो । 

तर, अहिले अन्जनाको करिअर बदलिएको छ । उनले काम गरेको फिल्म ‘पुजार सार्की’ बक्स अफिसमा सफलतापूर्वक चलिरहेको छ । यो फिल्ममा उनले निर्वाह गरेको भूमिकाले पनि निकै चर्चा पाइरहेको छ । 

अन्जनाको तेस्रो फिल्म बक्स अफिसमा सफल भइरहँदा उनले नायक पुष्प खड्काको अपोजिटको रुपमा फिल्म ‘सिड्नी ब्लुज’ साइन गरिन् । यो फिल्मको छायांकन कहिले सुरु हुन्छ पक्का भएको छैन । यस्तै, उनले अर्को आशातीत फिल्म ‘पूर्ण बहादुरको सारङ्गी’ पनि साइन गरेकी छिन् ।

यो फिल्ममा उनी प्रकाश सपुतसँग देखिदैछिन् । यसरीहेर्दा, छोटो समयमा नै  उनको करिअरले छलाङ मारेको छ । नाम चलेका ब्यानरले उनलाई सम्झिन थालेका छन् । यसले, अन्जनाको करिअर फिल्म क्षेत्रमा अब बलियो बन्ने अपेक्षा गर्न सकिन्छ ।