अष्ट्रेलिया र न्युजिल्याण्डमा ‘फर्की फर्की’को कलेक्शन १ करोड माथि

नेपाली बक्स अफिसमा समेत आक्रामक व्यापार गरिरहेको फिल्म ‘फर्की फर्की’ले ओभरसिजमा पनि बम्पर व्यापार गरिरहेको छ । नायक अनमोल केसी स्टारर यो फिल्मले अष्ट्रेलिया र न्युजिल्यान्डको बक्स अफिसमा आक्रामक व्यापार गरेको वितरक नमस्ते इन्टरटेन्मेन्टले जनाएको छ । यो फिल्मले तीन दिनमा दुई मुलुकमा १ करोड रुपैयाँ भन्दा बढी कलेक्शन गरेको वितरण कम्पनीले जनाएको हो । 

यो फिल्म अष्ट्रेलीयाका ८ र न्युजिल्यान्डका ६ वटा राज्यमा रिलिज भइरहेको छ । फिल्मले बक्स अफिस कलेक्शनमा यसअघि रिलिज भएका नेपाली फिल्मको रेकर्डलाई उछिनेको बताइएको छ । 

वितरक देव कार्कीका अनुसार यो फिल्म न्युजिल्यान्ड र अष्ट्रेलीयाका ४५ हलका ५ सय पर्दामा रिलिज भइरहेको छ । गोल्डक्लासका थिएटरमा समेत फिल्म हाउसफुल रहेको कार्कीले बताए । 

यस्तै, यो फिल्म अमेरिकामा पनि रिलिज भइरहेको छ । अमेरिकामा फिल्म वितरण गरिरहेका प्याट्रिक सुवेदीले ११ वटा शहरमा फिल्मले दर्शकको उच्च साथ पाएको बताए । 

नेपाली दर्शकबाट समेत निकै राम्रो प्रतिक्रिया पाएको यो फिल्मले बिहिबार र शनिबार बिष्फोटक व्यापार गरेको थियो । फिल्मको व्यापार आइतबार र सोमबार पनि सुखद रहेको वितरक गोविन्द शाहीले बताएका छन् । भोलि, गणतन्त्र दिवसको बिदा भएकाले पनि फिल्मले फेरि दर्शकको उच्च साथ पाउने अपेक्षा गरिएको छ । 

सुयोग गुरुङ निर्देशित यो फिल्ममा अनमोल केसी, जसिता गुरुङ, रवि काफ्ले, समृद्धी अर्याल लगायतका कलाकारको अभिनय छ ।