‘सतीदेवी’को नयाँ पोस्टरमा मलिकाको फरक गेटअप

साउनको ४ गतेबाट रिलिजमा आउन लागेको फिल्म ‘सतीदेवी’को दोस्रो पोस्टर सार्वजनिक गरिएको छ । सार्वजनिक पोस्टरमा नायिका मलिका महतले नवजात शिशुलाई स्तनपान गराइरहेको देख्न सकिन्छ । उनको आँखाबाट बलिन्द्र आँसु झरिरहेका छन् । 

यसअघि सार्वजनिक पोस्टरमा मलिकालाई कालो मोसो दलेको देखाइएको थियो । तर, यसपटक भने उनी रुँदै स्तनपान गराइरहेकी छिन् । यसबाट पनि फिल्ममा मलिकाको भूमिका के भन्ने अनुमान लगाउन सहज हुनेछ ।

सार्वजनिक पोस्टरमा मलिकासँगै दुई बाल–कलाकारहरु हर्षिका वली र मन्जिला बानियाँ रोइरहेका छन् । हर्षिका हातमा चप्पल समातेर विक्षिप्त अवस्थामा छिन् भने आँसु झारिरहेकी मन्जिलाको हातमा सानो हाँगा छ । 

सार्वजनिक पोस्टरले दर्शकमाझ फिल्मलाई लिएर झनै उत्साह बढ्ने निश्चित छ । लक्ष्मण सुवेदीको लेखन, निर्माण तथा निर्देशनमा तयार भएको यो फिल्मले विभिन्न महोत्सवबाट ‘उत्कृष्ट फिल्म’को अवार्ड पाइसकेको छ । यसैले, बक्स अफिसमा पनि यो फिल्मले दर्शकको साथ पाउने अपेक्षा गर्न सकिन्छ ।