‘ज्वाइँ साब’का लागि नीतिको उत्साह

नायिका नीति शाह फिल्म ‘ज्वाइँ साब’को तयारीमा व्यस्त छिन् । यो फिल्मको छायांकन अबको एक सातामा सुरु गर्ने तयारी निर्माणपक्षको छ ।

यसैले, नीतिले पनि फिल्मका लागि आफ्नो तयारी गरिरहेकी छिन् । केही दिन अगाडिसम्म फिल्म ‘खजुरे ब्रो’को प्रचारमा दौडिएकी नीति अहिले भने पूर्ण रुपमा ‘ज्वाइँ साब’मा केन्द्रित छिन् । 

यो फिल्मका लागि नीति केही समयदेखि वर्कशपमा पनि छिन् । निर्देशक निरौलाले नीतिले फिल्मको पूर्व तयारीका लागि निकै मिहिनेत गरेको बताए । 

यो फिल्मलाई राज कुमार पण्डितको प्रस्तुतिमा निर्माण गरिँदैछ । फिल्ममा नीतिको जोडीको रुपमा कलाकार जितु नेपालले काम गर्दैछन् । 

फिल्म ‘ज्वाइँ साब’को छायांकन चित्लाङ र सौराहामा गर्ने तयारी निर्माणपक्षको छ । पहिलो फिल्मको असफलताले नीति अझै गम्भीर बनेकी छिन् ।

यसैले, दोस्रो फिल्ममा उत्कृष्ट काम गर्न उनी लागिपरेकी छिन् । फिल्मको वर्कशपका कारण छायांकन केही दिन सरेको निर्देशक निरौलाको भनाई छ ।