जापानको नागोयामा जुनमा रिलिज हुँदै ‘फर्की फर्की’

यो बर्षको प्रतीक्षित फिल्म ‘फर्की फर्की’ जापानको नागोया शहरमा रिलिज हुने भएको छ । यो फिल्मलाई जुनमा जापानमा रिलिज गर्न लागिएको वितरण संस्थाले जनाएको छ । 

यूएनए इन्टरटेनमेन्टले यो फिल्मलाई नागोयामा रिलिज गर्न लागेको हो । यो फिल्म हलमै रिलिज हुने यूएनएका प्रमुख उज्ज्वल गुरागाँइले जानकारी दिए । 

रोहित अधिकारी र ओम प्रकाश अग्रवालको निर्माणमा तयार भएको यो फिल्म अहिले चर्चामा छ । सुयोग गुरुङको लेखन तथा निर्देशनमा तयार भएको फिल्ममा अनमोल केसी, जसिता गुरुङ, रवि काफ्ले, समृद्धी अर्याल लगायतका कलाकारको अभिनय छ । 

यो फिल्मको अष्ट्रेलिया, अमेरिका लगायतका देशको अधिकार पनि विक्री भइसकेको छ । नेपालमा पनि यो फिल्मको चर्चा उच्च छ । 

यसैबिच, यूएनए इन्टरटेन्मेन्टले फिल्म ‘बोक्सीको घर’लाई पनि जापानमा रिलिज गर्न लागेको छ । जापानको नागोया शहरमा जुन २ तारिखको दिउँसो ३ बजे मिडल्याण्ड स्क्वायर सिनेमा यो फिल्म रिलिज हुन लागेको हो । नेपालमा सुखद कमाई गरेको केकी अधिकारी अभिनित फिल्मले जापानमा पनि राम्रो व्यापार गर्ने अपेक्षा गरिएको छ ।