अनमोल र सन्तोषको सहकार्यको तयारी

नायक अनमोल केसी अभिनित फिल्म ‘फर्की फर्की’ जेठको १० गतेबाट सुरु हुँदैछ । यो फिल्मको प्रचारमा अनमोल तीब्र रुपमा लागिपरेका छन् । 

यो फिल्म रिलिज भएपछि अनमोलले ‘जेरी २’मा काम गर्ने पक्का भइसकेको छ । यो फिल्मको टिमले पूजा पनि गरिसकेको छ । 

अब, नायक केसी र निर्देशक तथा निर्माता सन्तोष सेनबीच नयाँ फिल्मका लागि सहकार्य हुने भएको छ । फिल्म ‘बलिदान’मा पनि अनमोललाई सन्तोषले अफर गरेका थिए । तर, विविध कारणले गर्दा यी दुईको सहकार्य संभव भएन ।

तर, अब सुरुवातदेखि नै बसेर नयाँ फिल्ममा काम गर्ने गरि उनीहरू अगाडि बढेका छन् । सन्तोषले पनि मेरो फिल्मसँग कुरा गर्दै अनमोलसँग सहकार्यका लागि काम अगाडि बढेको बताए । 

सन्तोष हाल फिल्म ‘बलिदान’को छायांकनको पूर्व तयारी गरिरहेका छन् । यो फिल्मको छायांकन सकिएपछि अनमोलसँगको फिल्मका लागि काम सुरु गर्ने उनको भनाई छ । 

अनमोलले यसका लागि सन्तोषसँग कुरा पनि गरिसकेका छन् । आउँदो बर्ष फिल्मको छायांकन सुरु गर्ने योजना सन्तोष र अनमोलको छ । 

सन्तोष ‘बलिदान’पछि एक पिरियड ड्रामामा काम गर्ने तयारीमा छन् । यही कथामा काम गर्ने भद्र सहमति अनमोल र सन्तोषबीच भएको छ । तर, अनमोलले लिखित संझौता भने गरेका छैनन् ।