अनमोलसँग सहकार्यबारे प्रदिप भन्छन्–‘सबैलाई विश्वस्त पार्ने गरि एकसाथ काम गर्छौ’

नेपाली फिल्म क्षेत्रमा नायकद्धय अनमोल केसी र प्रदीप खड्काको चर्चा सधैं नै हुने गर्दछ । अनमोल केसी र प्रदीप खड्काबीच शीतयुद्ध छ पनि भनिन्छ । झन्, जेठको १० गते अनमोल केसी अभिनित फिल्म ‘फर्की फर्की’ र प्रदीप खड्का अभिनित फिल्म ‘पुजार सार्की’ एकसाथ रिलिज हुने भएपछि, यी दुईको चर्चा फेरि चुलिएको छ । 

प्रदीप र अनमोलको स्टारडमको चर्चा पनि निकै हुने गर्दछ । यसैले, यी दुइबिच स्टारडमको लडाई छ भनिन्छ । तर, नायक प्रदीप खड्काले भने आफूहरुबिच कुनै पनि खालको दुश्मनी नभएको बताएका छन् । मेरो फिल्मसँग कुराकानीमा उनले भने–‘यी सबै कुराहरुलाई बोलीले भन्दा पनि कामले नै प्रमाणित गर्छौ । चाँडै नै प्रमाणित पनि गरौंला । तर, जबर्जस्ती काम गरेर पनि हुँदैन । राम्रो आइडिया चाहिन्छ ।’

उनले अगाडि भने–‘दर्शकले हामीलाई हेर्न खोज्नुभएको छ । यो कुरा हामीले पनि महशुश गरेका छौं । तर, जे पायो त्यही गरेर पनि भएन नी । यसका लागि त हामी अझ बढी सजग हुनुपर्छ । हामी एकसाथ पक्का पनि काम गर्छौ । तर, यसका लागि दुबै जना विश्वस्त हुने कथा पनि चाहिन्छ । हतार गरेर त किन आउने, होइन र ?’