‘होस्टेल ३’मा पारस बम फाइनल

फिल्म ‘होस्टेल’को २ सिरिजबाट नायकहरू अनमोल केसी, सलोन बस्नेत, नाजिर हुसेन, सुशील श्रेष्ठ उदाएका थिए । यस्तै, नायिकाको रुपमा यही फिल्मको दोस्रो सिरिजबाट उदाएकी स्वस्तिमा खड्का अहिले स्टार भइसकेकी छिन् । यसैले, ‘होस्टेल’ ब्रान्डलाई नेपाली फिल्म क्षेत्रमा स्टार जन्माउने फिल्मको रुपमा हेर्न सकिन्छ । 

अब, यो फिल्मको तेस्रो सिरिज पनि बन्दैछ । यसपटक भने यो फिल्मको मुख्य भूमिकामा ‘कुल ब्वाई’को नामबाट चिनिएका पारस बम अनुबन्धित भएका छन् । सशान कँडेलको निर्देशनमा बन्न लागेको यो फिल्ममा पारस पनि मुख्य पात्रको भूमिकामा देखिदैछन् ।

उनी, टिकटकर हुँदै इन्टरनेटमा ‘भिडियो कन्टेन्ट कृयटर’को रुपमा चर्चित छन् । होस्टेलमा बसेर अध्ययन गरिरहेका युवाहरूको विभिन्न घटनामा आधारित रहेर यो फिल्म बन्न लागेको हो । 

यो फिल्मका मुख्य कलाकार पारसले ‘कान्छी कता हिँडेको, बुबाको नाक होस्’ जस्ता गीत गाएका छन् । पारसलाई अनुबन्धित गर्नुको कारणबारे सशानले भने–‘जुन पात्र फिल्मको स्क्रिप्टले माग गरेको छ, त्यो पात्रमा पारस सबै पक्षबाट उत्तम रहेकाले अनुबन्धित गरिएको हो । यो फिल्मबाट पारससहित अन्य स्टारहरूको पनि जन्म हुनेछ ।’ यो फिल्ममा माधव शर्माको स्क्रिप्ट छ ।

निर्देशक सशानकै कथा रहेको फिल्मलाई यो बर्षको अन्त्यतिर रिलिज गर्ने योजना निर्माणपक्षको छ । सम्मान इन्टरटेन्मेन्टले आरोन कन फिल्मसँगको सहकार्यमा तयार पार्न लागेको फिल्ममा शिशिर ज्ञवालीको लगानी रहनेछ ।

शंकर कोइराला कार्यकारी निर्माता रहेको फिल्ममा सुधा महरठ्ठा, सुरेश कँडेल र अर्जुन सापकोटा सह–निर्माताको रुपमा छन् ।