उच्च शो सहित ‘मनसरा’ रिलिज, कस्तो छ बिहानको अकुपेन्सी ?

उपेन्द्र सुब्बाको लेखन तथा निर्देशनमा तयार भएको फिल्म ‘मनसरा’ आजबाट रिलिजमा आएको छ । यो फिल्मले देशभरका हलमा उच्च शो समेत पाएको छ ।

यसैले, फिल्मले बक्स अफिसमा आक्रामक व्यापार गर्ने अपेक्षा गरिएको छ । प्रिमियरबाट पनि निकै तारिफ कमाएको फिल्मले दर्शकको साथ पाउने विश्वास निर्माणपक्षको छ । 

मिरुना मगर, प्रवीण खतिवडा, मेनुका प्रधान, दयाहाङ राई, उपेन्द्र सुब्बा लगायतका कलाकारको अभिनय रहेको यो फिल्मले मानिसको जीवन र सम्बन्धको कथा भन्छ । फिल्मबाट कलाकार प्रवीण खतिवडाको तारिफ भइरहेको छ । 

यो फिल्मले बिहानी शोजमा भने औषत सुरुवात गरेको छ । यसलाई फिल्मको अपेक्षित सुरुवात मान्न मिल्दैन । किनकी, फिल्मको बूकिङ कमजोर हुँदा त्यसको प्रभाव बिहानी शोमा देखिएको छ । तर, फिल्मले दर्शकको बलियो वर्ड अफ माउथ पाएको खण्डमा दिवा र बेलुकीका शोहरुमा अकुपेन्सी बढ्नेछ । 

शैलेन्द्रध्वज कार्कीको छायांकन तथा निर्माणमा तयार भएको फिल्मको टिम दर्शकसँग साक्षात्कार गर्न पूर्वका विभिन्न हलहरुमा पुगिरहेको छ ।