‘महाजात्रा’को ‘मुरी मुरी साथी’ गीत सार्वजनिक

हलमा रिलिज भइरहेको फिल्म ‘महाजात्रा’को नयाँ गीत ‘मुरी मुरी साथी’ सार्वजनिक गरिएको छ । सार्वजनिक यो गीतको भिडियोमा फिल्मका मुख्य ३ कलाकारहरू विपिन कार्की, रविन्द्र सिंह बानियाँ र रविन्द्र झाको मित्रतालाई देखाइएको छ ।

फिल्ममा उनीहरू बीच श्रङ्खलाबद्ध रुपमा आउने उतारचढावसँगै झाँगिएको मित्रतालाई प्रस्तुत गरिएको निर्देशक तथा लेखक प्रदीप भट्टराईले बताए । 

यो गीतको भिडियोमा मुख्य तीन पात्रहरूले जीवन जिउनका लागि गर्ने संघर्ष, विभिन्न अवरोधमा टिकेको मित्रता र उनीहरुको गरिबीले डगमगाउन नसकेको नैतिकतालाई प्रस्तुत गरिएको छ । गीतमा शब्द हर्क साउद, संगीत तथा स्वर कालीप्रसाद बास्कोटाको छ ।

पुरुषोत्तम प्रधानले फिल्मको छायांकन गरेका हुन् । चैत्र ९ गतेदेखि प्रदर्शनमा आएको यो फिल्मले बक्स अफिसमा सुखद कमाई गरिरहेको छ ।