विपिन–वर्षाको जोडीः ५ फिल्म रिलिज, ४ फिल्म हिट

नायक विपिन कार्की र नायिका वर्षा राउतले ५ वटा फिल्ममा काम गरिसकेका छन् । जसमध्ये, ४ वटा फिल्ममा उनीहरू जोडी नै बनेर काम गरेका छन् । 

वर्षा र विपिनको जोडीलाई दर्शकले ‘जात्रा’बाट मन पराएका हुन् । यसपछि, यी दुईले ‘जात्रै जात्रा, के घर के डेरा, महाजात्रा, गोपी’ लगायतका फिल्ममा काम गरिसकेका छन् । 

उसो त, विपिन र वर्षाको जोडी आम दर्शकमाझ जसरी चर्चामा आउनुपर्ने हो, त्यसरी आएको छैन । तर, उनीहरू बक्स अफिसमा भने निरन्तर सफल छन् । यी दुईले अभिनय गरेको फिल्म ‘महाजात्रा’ हलमा लागिरहेको छ । यो फिल्ममा त दर्शकले विपिन र वर्षाको कामलाई पनि निकै मन पराएका छन् । यसपटक, वर्षाले पनि फिल्ममा राम्रो भूमिका पाएकी छिन् । उनको भूमिकाले पनि दर्शकलाई प्रभावित बनाउँछ । 

फिल्म ‘के घर के डेरा’ पनि व्यापारिक रुपमा सफल भयो । यो फिल्ममा पनि विपिन र वर्षा श्रीमान्–श्रीमतीको भूमिकामा देखिएका थिए । 

यी दुईले अभिनय गरेर बक्स अफिसमा नचलेको फिल्म ‘गोपी’ मात्र हो । तर, यो फिल्मले समीक्षा भने उत्कृष्ट पाएको थियो । विभिन्न अवार्डमा पनि यो फिल्म उत्कृष्ट फिल्मको रुपमा चयन भयो । 

‘जात्रा, जात्रै जात्रा, के घर के डेरा र महाजात्रा’ हिट भइसकेपछि यी दुईले फिल्म ‘तेल भिसा’मा पनि काम गर्दैछन् । व्यवसायीक रुपमा सफल भएका वर्षा र विपिन आम दर्शकमाझ पनि जोडीको रुपमा परिचित हुन आवश्यक छ ।