‘मनसरा’को टिजरमा मिरुना र प्रविणको नोकझोक, कसको खोजीमा छन् दया ?

आउँदो वर्षको वैशाख २१ गतेबाट रिलिजमा आउन लागेको फिल्म ‘मनसरा’को टिजर सार्वजनिक गरिएको छ । फिल्मको टिजरमा मुख्य कलाकारहरू दयाहाङ राई, मिरुना मगर, प्रवीण खतिवडा, मेनुका प्रधान लगायतका कलाकारलाई देखाइएको छ । यो फिल्मले साथको कथा भन्ने निर्देशक तथा लेखक उपेन्द्र सुब्बाले जानकारी दिए । फिल्ममा मिरुना मगर शीर्ष भूमिकामा देखिएकी छिन् । 

फिल्मको टिजरमा एउटै समुदायमा बस्ने विभिन्न जातजातिका छिमेकीहरू बीचको रमाइलो प्रसंगलाई देखाइएको छ । साथमा, कसैको खोजीमा दौडिएका दयाहाङ राईको पात्रले दर्शकलाई उत्सुकता पैदा गराएको छ । यो फिल्ममा हेमन्त वुढाथोकी, शान्ति गिरी, नेनहान राईको पनि अभिनय छ ।

फिल्मका निर्माता छायांकार समेत रहेका शैलेन्द्र ध्वज कार्की हुन् । यस्तै, फिल्ममा विष्णु कुमार लिम्बु, मनोरथ पोखरेल, पर्शु अधिकारी, पिटर गुरुङ र जीवन लिम्बु थाक्लुङ सह–निर्माताको रुपमा छन् । फिल्ममा निमेष श्रेष्ठको सम्पादन छ ।

सिजन दाहाल कार्यकारी निर्माता रहेको फिल्मले पनि बक्स अफिसमा नयाँ रेकर्ड राख्ने अपेक्षा गरिएको छ । यो बर्ष नै रिलिजमा आएको फिल्म ‘जारी’ले नयाँ रेकर्ड बनाएपछि निर्देशक सुब्बामाथि ‘मनसरा’ उत्कृष्ट बनाउनुपर्ने दबाब छ ।