क्यूएफएक्सको फिल्म गर्दै सौगात, नयाँ फिल्म बनाउँदै सौरभ

फिल्म ‘अगस्त्य’को प्रचार प्रसारमा निकै व्यस्त बनेका नायक सौगात मल्ल अब नयाँ प्रोजेक्टको तयारीमा छन् । क्यूएफएक्सले बनाउन लागेको एक नयाँ प्रोजेक्टमा आफूले काम गर्न लागेको सौगातले बताए । सौगातले काम गर्न लागेको फिल्मको बारेमा अन्य केही जानकारी दिइएको छैन । 

यही फिल्मका अर्का नायक नाजिर हुसेनले पनि क्यूएफएक्सले नै बनाइरहेको नयाँ फिल्म ‘केटी हराएको सूचना’मा काम गरिरहेका छन् । नायक सौगात मल्लले केही फिल्म साइन गरेपनि कुनै पनि फिल्मको काम सुरु हुन सकेको छैन । यसैले, अब उनी क्यूएफएक्सले बनाउन लागेको नयाँ फिल्ममा काम गरेपछि अरु फिल्ममा जोडिने तयारीमा छन् । 

फिल्म ‘अगस्त्य’बाट निकै नै राम्रो तारिफ कमाएका सौगातले सधैं यस्तै भूमिका गर्नुपर्छ भन्ने नभएको बताए । उनले भने–‘सधै यस्तै भूमिका आउँछ भन्ने पनि हुँदैन । यसैले, नयाँ प्रोजेक्टमा काम गर्दा म दबाब ठान्दिनँ । जस्तो भूमिका आउँछ त्यसलाई नै राम्रो गर्ने कोशिशमा हुनेछु ।’

सौगातले ‘कोतपर्व, बलिदान, रिमै’ लगायतका फिल्म साइन गरेका छन् । यस्तै, फिल्म ‘अगस्त्य’का निर्देशक सौरभ चौधरीले नयाँ फिल्म बनाउने तयारी गरेका छन् । वैशाखको १ गते नयाँ फिल्मको घोषणा गर्ने तयारीमा उनी लागेका छन् । यो फिल्ममा पनि ‘अगस्त्य’कै निर्माताहरुको लगानी रहनेछ । यो फिल्मको काम सकेपछि मात्र ‘अगस्त्य २’ बनाउने तयारी सौरभको छ ।