‘बोक्सीको घर’को ‘जिन्दगीको कथा’ गीत रिलिज

फिल्म ‘बोक्सीको घर’को ‘जिन्दगीको कथा, यता न उता’ बोलको गीतको भिडियो सार्वजनिक भएको छ । गीतमा स्वीअरिती र निहारिकाको स्वर, मोनिसा निरौलाको संगीत र सुलक्षण भारतीको शब्द छ । यो फिल्म वैशाखको १४ गतेबाट रिलिजमा आउँदैछ ।

यो गीतको भिडियोमा नायिका केकी अधिकारी र फिल्मका निर्देशक सुलक्षण भारतीयलाई फिचरिङ गरिएको छ । भिडियोमा केकी र सुलक्षणको विवाह र त्यसपछिको अवस्थालाई देखाइएको छ । सामाजिक थ्रिलर जनरामा निर्माण भएको यो फिल्मले समाजले बोक्सीको आरोप लगाई गर्ने शोषणको कथालाई प्रस्तुत गरेको छ ।

यो फिल्ममा सुपला सापकोटा, स्वेच्छा राउत, सुलक्षण भारती, रमा थपलिया, सुष्मा निरौला, सबिन बास्तोला लगायतका कलाकारको पनि अभिनय छ । केकी अधिकारी फिल्मस्को प्रस्तुतिमा तयार भएको यो फिल्ममा बद्री अधिकारीको लगानी छ ।

शिवराम श्रेष्ठको छायांकन रहेको फिल्ममा लोकेश बज्राचार्यको सम्पादन छ ।