६ फिल्ममा प्रदीपसँग ७ नायिका

नायक प्रदीप खड्का धमाधम फिल्म साइन गरिरहेका छन् । प्रदीपको फिल्मको लाइनअप लामो बनेको छ । हाल फिल्म ‘पूजार सार्की’मा काम गरिरहेका प्रदीपले यसपछि ५ वटा फिल्मको काम सक्नुपर्नेछ । उनले, सबै फिल्ममा काम गर्ने पक्का गरिसकेका छन् । फिल्म ‘पूजार सार्की’मा नायिकाको रुपमा अन्जना बराइली र परीक्षा लिम्बुले काम गरिरहेका छन् । 

प्रदीपले अर्को फिल्म ‘पिताम्बर’ पनि साइन गरेका छन् । यो फिल्मको छायांकन जेठमा हुनेछ । फिल्ममा उनको जोडीको रुपमा नायिका आँचल शर्माले काम गर्ने पक्का भइसकेको छ । फिल्ममा सुरक्षा पन्त र सुपुष्पा भट्टको पनि मुख्य भूमिका छ । तर, विशेष श्रोतका अनुसार फिल्ममा सुरक्षाले प्रदीपको आमाको भूमिकामा काम गर्दैछिन् । 

प्रदीपले अर्को फिल्म ‘एक्टर’ पनि साइन गरेका छन् । फिल्म ‘एक्टर’मा दुई जना नायिका छन् । यो फिल्ममा प्रदीपसँग नायिका आना शर्मा र नव–कलाकार दिव्या रायमाझीले काम गर्दैछन् । 

प्रदीपले सुदर्शन थापाको निर्देशनमा बन्ने लभ स्टोरी फिल्ममा पनि काम गर्दैछन् । यो फिल्ममा प्रदीपसँग नायिका पूजा शर्माले रोमान्स गर्दैछन् । 
प्रदीपले फिल्म ‘एक्लो’ पनि साइन गरेका छन् । प्रदीप शाहीको निर्देशनमा बन्ने यो फिल्ममा नायिकाको रुपमा बेनिशा हमाल फाइनल भइसकेकी छिन् । 

प्रदीपले फिल्म ‘‘ऐरी’’मा पनि काम गर्ने पक्का भइसकेको छ । तर, यो फिल्मका लागि भने अहिलेसम्म नायिका फाइनल गरिएको छैन । 

अर्को बर्ष बर्ष पनि प्रदीप व्यस्त रहने उनको लाइनअपले पनि प्रमाणित गर्छ । कुनै समय फिल्म साइन गर्न नै नमान्ने प्रदीपले यो बर्ष भने धमाधम फिल्म साइन गरिरहेका छन् ।