‘पूजार सार्की’को फन्डाः दृश्य लिक भयो भन्दै प्रचार गर्ने कि हटाउन तिर लाग्ने ?

दिनेश राउतको निर्देशनमा तयार भइरहेको फिल्म ‘पूजार सार्की’को सेटबाट २५ सेकेन्ड लामो भिडियो युट्युबमा अपलोड गरिएको छ । यो भिडियो  युट्युबमा आएपछि यसको निर्माणपक्षले दृश्य लिक भएको भन्दै हल्ला गरिरहेको छ ।

फिल्मको दृश्य लिक भएको भन्दै नायक प्रदीप खड्काले पनि उक्त भिडियो लिंक शेयर गरेका छन् । यता, फिल्मका निर्देशक दिनेश राउतले दृश्य लिक हुँदा तनाव भएको बताएका छन् । 

तर, रोचक कुरा के छ भने फिल्मको सुटिङ सेटबाट नायक आर्यन  सिग्देलको २५ सेकेन्ड लामो नृत्यको दृश्य लिक हुँदा यसको निर्माणपक्षले साइबर क्राइममा उजुरी गर्ने, हटाउन लगाउने केही काम गरेको छैन । बरु, उल्टै दृश्य लिक भएको भन्दै प्रचार गरिरहेको छ । यसले, निर्माणपक्ष आफैले सुनियोजित रुपमा दृश्य लिक गरेको प्रष्ट बुझिन्छ । 

फिल्मको सुटिङ सेटमा आएका दर्शकले नै भिडियो खिचेर अपलोड गरेको तर्क दिँदै निर्देशक राउत हिँडेका छन् । सार्वजनिक भिडियोमा नायक आर्यन सिग्देल छमछमी नाचेका छन् । उनले ढाका टोपी लगाएका छन् । उनी पुजारीको भूमिकामा रहेको अनुमान लगाउन सकिन्छ । 

यो फिल्ममा आर्यन सिग्देल, प्रदीप खड्का, पल शाह, अन्जना बराइली, परीक्षा लिम्बु लगायतका कलाकारको अभिनय छ । फिल्ममा विकास सुवेदीको लेखन छ । फिल्ममा सुभाष भुसालको लगानी छ । राजेश श्रेष्ठको डीओपी रहेको फिल्ममा सुप्रिम पराजुलीको सम्पादन, हिमाल केसीको एक्सन छ ।