‘बद्री बहादुर’को ‘पुलिस दाई’ गीत रिलिज

चैत्रको २३ गतेबाट रिलिजमा आउन लागेको फिल्म ‘बद्री बहादुर’को पहिलो गीत ‘पुलिस दाई’ सार्वजनिक भएको छ । आज काठमाडौंमा आयोजना गरिएको एक कार्यक्रममा शिवम् अधिकारीको शब्द, टंक वुढाथोकीको संगीत, टंक र मिलन नेवारको स्वरमा समावेश गीत सार्वजनिक गरिएको हो । यो गीतको भिडियोमा अतिथि कलाकारद्वय नायिका पूजा शर्मा र नायक सलोन बस्नेतले नृत्य गरेका छन् ।

साथमा, फिल्मका मुख्य कलाकारहरू जयकिसन बस्नेत, राजिब बस्नेत र छुल्ठिम गुरुङलाई फिचर्ड गरिएको छ । शिव विकको कोरियोग्राफी रहेको गीतमा विनोद सापकोटाको छायांकन छ ।

रवि अधिकारी कार्यकारी निर्माता रहेको यो फिल्म सलोन सलिना फिल्मस् र एवी पिक्चर्स फार्मको ब्यानरमा निर्माण भएको हो । शोभित बस्नेतको निर्देशनमा तयार भएको फिल्ममा एलिना गुरुङ, धिरेन शाक्य, वर्षा चौलागाईंको पनि अभिनय छ ।

फिल्ममा टंक वुढाथोकी र उजन नेम्वाङको संगीत, रामकाजी घिमिरेको लेखन, शिव बिकको नृत्य निर्देशन, शंकर महर्जनको एक्सन, समीर मियाँको सम्पादन छ । आरआर फिल्मस्ले वितरण गर्ने फिल्म काठमाडौं, लमजुङ, धरान र संखुवासभा क्षेत्रमा छायाङ्कन गरिएको हो ।