प्रदीपको फिल्ममा प्रदीप खड्का

नायक प्रदीप खड्काले नयाँ फिल्म साइन गरेका छन् । लामो समयदेखि बेलायतमा बस्दै आएका निर्देशक प्रदीप शाहीले बनाउन लागेको नयाँ फिल्ममा प्रदीप अनुबन्धित भएका हुन् । यो फिल्मको नाम भने सार्वजनिक गरिएको छैन ।

साइ प्रोडक्सन नेपालको ब्यानरमा निर्माण हुने यो फिल्ममा ह्रयाम्साएर एकाउन्टेनको पनि निर्माण सहकार्य हुनेछ । शनिबार निर्माण टिम र प्रदीपबीच सहकार्यका लागि संझौता भएको हो । यो फिल्मको कथा निर्देशक शाहीले नै लेखेका हुन् । साई–फाई जोम्बी थ्रिलर जनरामा यो फिल्म निर्माण हुनेछ ।

फिल्मलाई विनोद सुवेदी खत्री ‘क्षितिज’ले निर्माण गर्नेछन् । अन्य कलाकार र प्राविधिकको टुंगो चाँडै नै लगाउने निर्माणपक्षले बताएको छ । प्रदीपले फिल्म ‘गोर्खा बिनिथ द ब्रेभरी’ निर्देशन गरेका थिए । 

नायक प्रदीप खड्का भने यतिबेला फिल्म ‘पुजार सार्की’को छायांकनमा व्यस्त छन् । यसपछि, उनले वैशाखबाट फिल्म ‘एक्टर’को छायांकन सुरु गर्ने जानकारी दिएका छन् । प्रदीपले फिल्म ‘ऐरी र पिताम्बर’ पनि साइन गरिसकेका छन् ।

साथै, उनले सुदर्शन थापाको एक लभ स्टोरी फिल्ममा पनि काम गर्ने पक्का भइसकेको छ । यसरी हेर्दा, आउँदो बर्ष पनि प्रदीप पूर्ण रुपमा व्यस्त हुने देखिएको छ ।