‘रङ्गेली’लाई दर्शकको साथ

आजबाट देशभरका हलमा रिलिज भएको फिल्म ‘रङ्गेली’ले दर्शकको साथ राम्रो पाएको निर्माणपक्षले बताएको छ । आज फिल्मको अकुपेन्सी ७० प्रतिशत रहेको वितरकले बताएका छन् । 

क्यूएफएक्स चेनका हलमा उल्लेख्य शोज नभएपनि प्राप्त भएका शोजमा दर्शकको चाप उच्च थियो । 

फिल्मका कार्यकारी निर्माता जितेन्द्र खतिवडाले बलियो वर्ड अफ माउथका कारण दर्शकको उपस्थिति बढेको बताए । वितरक गोविन्द शाहीले पनि फिल्मले दर्शकको राम्रो साथ पाएको र भोलिबाट अझै बढ्ने विश्वास व्यक्त गरे ।

दर्शकहरुले आफ्नै वरपरको जस्तो महशुश हुने समय अनुसारको कथा र कथा भन्ने शैली मन पराएको प्रतिक्रिया दिएका छन् । यस्ता प्रकारका फिल्महरू निर्माण हुन आवश्यक रहेको दर्शकको प्रतिक्रिया थियो । यो फिल्मको मेकिङ र क्याइमेक्समा दर्शकले बढी मनोरञ्जन लिएका थिए ।

फिल्मका लेखक तथा निर्देशक अर्जुन सुवेदीले आफू एकदमै उत्साहित रहेको प्रतिक्रिया दिए । उनले भने–‘दर्शकले फिल्म मन पराइरहनुभएको छ भन्ने थाहा पाउँदा खुशी लागेको छ । सेकेन्ड हाफको ट्विस्टलाई दर्शकले कसरी लिनुहुन्छ भन्ने शंकामा थिएँ । तर, त्यसैमा बढी दर्शकले मनोरञ्जन लिनु भएको छ ।’

यो फिल्ममा दयाहाङ राई, मिरुना मगर, अर्पण थापा, प्रवीण खतिवडा, रमेश वुढाथोकी, रुपेश झा, सुन्दर धिताल लगायतका कलाकारको अभिनय छ । जितेन्द्र खतिवडा र अनुज जंग थापा कार्यकारी निर्माता रहेको फिल्ममा संसार चौलागाई र रमेश भट्टराइको लगानी छ । युवक कार्की र शिव शंकर चौलागाँई सह–निर्माता रहेको फिल्मलाई सुशन प्रजापतिले खिचेका हुन् ।