दोस्रो सातामा पनि ‘अगस्त्य’लाई दर्शकको उच्च साथ

आजबाट रिलिजको दोस्रो सातामा प्रवेश गरेको फिल्म ‘अगस्त्य’लाई दर्शकले उच्च साथ दिएका छन् । दोस्रो सातामा फिल्मको शोहरु कम भएपनि दर्शकको चाप भने घटेको छैन । फिल्मले पाएको शोजमा दर्शकको अकुपेन्सी सुखद छ । 

सौरभ चौधरीको लेखन तथा निर्देशनमा तयार भएको यो फिल्मको पहिलो साताको व्यापार पनि उत्साहजनक रहेको निर्माणपक्षले बताएको छ ।

दर्शकबाट सकारात्मक वर्ड अफ माउथ पाएका कारण फिल्मको व्यापार दोस्रो हप्ताको शुक्रबार पनि सुखद बनेको हो । 

यो फिल्मको मेकिङ, कथावस्तु, कलाकारको अभिनय, एक्सनलाई दर्शकले निकै रुचाएका छन् । आज पनि फिल्मले देशभरका मल्टिप्लेक्समा राम्रो व्यापार गरेको निर्माणपक्षले बताएको छ । 

यसैबिच, फिल्मको टिमले ‘रोई रहूँ जस्तो लाग्छ’ बोलको गीत पनि सार्वजनिक गरेको छ । एसडी योगीको स्वर तथा संगीत रहेको गीतमा राम अविरल विष्टको शब्द छ । डार्क हसै इन्टरटेन्मेन्ट र सेभेन सिज इन्टरटेन्मेन्टको प्रस्तुतिमा तयार भएको यो फिल्म बुधबारदेखि मध्यपूर्वका देशमा समेत रिलिजमा आएको छ । युएइ, कतार र बहराइनमा फिल्म रिलिज भएको वितरण कम्पनीले जानकारी दिएको छ । 

यो फिल्ममा सौगात मल्ल, नाजिर हुसेन, मलिका महत, प्रमोद अग्रहरी, विजय बराल, बेन बस्नेत, रविन्द्र झा, शिशिर वाङ्देल, सिम्रन खड्का लगायतका कलाकारको अभिनय छ । 

निर्माणपक्षले यसको दोस्रो च्याप्टर सन् २०२६ मा रिलिज गर्ने बताएको छ ।