‘उपहार, रङ्गेली र काँडेतार’ रिलिज, दोस्रो सातामा ‘अगस्त्य’

आज शुक्रबारबाट ३ नयाँ फिल्म रिलिजमा आएका छन् । आजबाट ‘उपहार, रङ्गेली र काँडेतार’ हलमा रिलिज भएका हुन् । यी तीन फिल्मको कथावस्तु भने फरक छ । तीन फिल्म एकसाथ रिलिज हुँदा हल विभाजनमा पनि समस्या भएको छ । यी फिल्महरूले हलमा कम शोज पाएका छन् । 

ज्ञानेन्द्र देउजाको निर्देशनमा तयार भएको चलचित्र ‘उपहार’मा रेखा थापा, पूजा शर्मा, बेनिशा हमाल, मुकुन भुसाल, तेज गिरी, समर्पण जंग कार्की, शिशिर राणा, सुष्मा कार्की लगायतका कलाकारको अभिनय छ ।

यो चलचित्रले समसामयिक विषयवस्तुलाई निकै नै रमाइलो तरिकाले उठाएको छ । फिल्मको  पहिलो हाफमा कमेडी भरपूर छ । दोस्रो हाफमा भने गम्भीरतालाई केन्द्रमा राखिएको छ । 

यस्तै, अर्जुन सुवेदीको डेब्यू निर्देशनमा तयार भएको चलचित्र ‘रङ्गेली’ पनि आजबाट हलमा लागेको छ । चलचित्रमा दयाहाङ राई, मिरुना मगर, अर्पण थापा, प्रवीण खतिवडा लगायतका कलाकारको अभिनय छ । ‘रङ्गेली’मा राज गर्नका लागि ग्याङस्टारबिच हुने लडाइको कथालाई यो फिल्मले उठान गरेको छ । 

नवल खड्काको निर्माण, निर्देशन तथा अभिनयमा तयार भएको चलचित्र ‘काँडेतार’ पनि आजबाट हलमा लागेको छ । यो चलचित्रमा नवल खड्काको साथमा गौरव पहारी, रेबिका गुरुङ, सुरबिना कार्की लगायतको अभिनय छ । नेपाल र भारतको सिमानामा काँडेतार लगाउनुपर्छ भन्ने कथामा यो फिल्म बनेको छ । 

गत साताबाट रिलिजमा आएको फिल्म ‘अगस्त्यः च्याप्टर १’ आजबाट दोस्रो सातामा प्रवेश गरेको छ । सौरभ चौधरीको लेखन तथा निर्देशनमा तयार भएको यो फिल्ममा सौगात मल्ल, नाजिर हुसेन, मलिका महत, प्रमोद अग्रहरी लगायतको अभिनय छ ।

यो फिल्मले पहिलो सातामा सुखद व्यापार गरेको छ । यो फिल्मलाई दर्शकले मन पराएका छन् । यसैले, दोस्रो सातामा पनि दर्शकले यो फिल्मलाई मन पराउने विश्वास निर्माणपक्षको छ ।