‘डिग्री माइला’ पछि ‘मेयर’मा जोडिइन् ऋचा

नायिका ऋचा शर्माले केही महिना अगाडि फिल्म डिग्री माइला’को छायांकन सकिन् । निर्माणपक्षले अहिलेसम्म यो फिल्ममा ऋचा पनि रहेको खुलाएको छैन । तर, फिल्ममा ऋचाको विशेष भूमिका रहेको वुझिएको छ । 

यो फिल्मको छायांकन सकेकी ऋचा सर्लाहीमा छायांकन भइरहेको फिल्म ‘मेयर’मा जोडिएकी छिन् । फिल्मका निर्देशक दीपेन्द्र के खनालले ऋचाले आजबाट फिल्मको छायांकन सुरु गरेको मेरो फिल्मलाई जानकारी दिएका छन् । फिल्ममा उनको भूमिका के हो भन्ने खुलेको छैन । 

श्रोतका अनुसार, ऋचाले अन्य केही फिल्ममा पनि काम गर्ने पक्का भएको छ । तर, कुनै पनि फिल्मको निर्माणपक्षले ऋचाको भूमिकाको बारेमा खुलाएका छैनन् । ऋचाले पनि आफूले काम गर्न लागेका फिल्मको बारेमा जानकारी दिएकी छैनन् । 

ऋचाले काम गरिरहेका फिल्ममा उनी मुख्य नायिका भने होइनन् । ‘डिग्री माइला’मा नायिका आँचल शर्मा मुख्य नायिकाको रुपमा छिन् भने ‘मेयर’मा वर्षा राउतले मुख्य नायिकाको रुपमा काम गरिरहेकी छिन् । 

वुझिएअनुसार, ऋचाले ‘बलिदान’ नामक  फिल्म पनि साइन गरेकी छिन् ।