‘उपहार’बारे पूजा भन्छिन्–‘मेरो भूमिका जोखिम र चुनौतीले भरिएको छ’

नायिका पूजा शर्माले शुक्रबारदेखि रिलिजमा आउन लागेको फिल्म ‘उपहार’बाट आफू उत्साहित रहेको बताएकी छिन् । फिल्मको विषयमा उनले भनिन्–‘म गाउँबाट शहर झरेकी युवतीको भूमिकामा छु । काठमाडौंमा बाँच्न र पैसा कमाउनका लागि कस्तो कस्तो काम गर्नु पर्छ भन्ने चरित्र मैले निर्वाह गरेको छु । फिल्ममा मेरो पात्रले गलत बाटो समेत अपनाएको छ । अहिलेका युवापुस्तामा भइरहेको घटनालाई मेरो पात्रमार्फत देखाइएको छ ।’

यो फिल्ममा पूजाले ‘पूजा’ पात्रकै भूमिकामा काम गरेकी छिन् । उनले भनिन्–‘अहिलेको युवापुस्तामा जसरी पनि पैसा कमाउनुपर्छ भन्ने सोच छ । फिल्ममा पूजा पात्रले गलत काम गरिरहेको हुन्छे । तर, उसलाई गलत काम गर्नु हुँदैन भन्ने सोच पनि पलाउँछ ।’

यो पात्रका लागि निर्देशक देउजाले अरु नायिकाहरूलाई पनि अफर गरेका थिए । तर, अधिकांशले यो भूमिका निर्वाह गर्न नचाहेपछि पूजाले नै स्विकार गरेकी थिइन् । अहिले, ट्रेलर सार्वजनिक भएपछि पूजाको संवादको चर्चा भइरहेको छ । पूजाले सुरुवातमा यही फिल्ममा अर्की नायिका बेनिशा हमालले गरेको वकिलको भूमिका निर्वाह गर्न लागेकी थिइन् । तर, बेनिशाले ‘पूजा’ पात्र आफूलाई नसुहाउने भनेपछि पूजाले स्विकार गरेकी थिइन् । 

अधिकांश नायिकाहरूले फिल्ममा काम गर्दा नकारात्मक पात्रमा आफूलाई देखाउन नचाहेको पूजाको नाई छ । उनले भनिन्–‘एउटा कलाकार भएपछि जुनसुकै चरित्र पनि निर्वाह गर्नुपर्छ । यो मेरो लागि नयाँ चिज हो । मैले चरित्रमा जोखिम मोलेकै हो । मेरो अपोजिटमा शिशिर राणाले काम गर्ने भएपछि मलाई अझै सहज भयो ।’

आफ्ना लागि यो भूमिका चुनौतीपूर्ण भएपनि अहिले ट्रेलर सार्वजनिक भएपछि दर्शकले मन पराएको भन्दै पूजा दंग छिन् । यो फिल्मको प्रचारमा दौडधूप गरिरहेकी पूजा व्यापारिक रुपमा पनि फिल्म सफल हुनेमा विश्वस्त देखिएकी छिन् ।

ज्ञानेन्द्र देउजाको निर्देशनमा तयार भएको फिल्ममा पूजाको साथमा रेखा थापा, बेनिशा हमाल, मुकुन भुसाल, तेज गिरी, समर्पण जंग कार्की लगायतका कलाकारको अभिनय छ ।