देशभर ‘अगस्त्य’ रिलिज, प्रिमियरमा कसले के भने ?

टिजर र ट्रेलर रिलिज भएपछि दर्शकको ध्यान केन्द्रित गर्न सफल भएको फिल्म ‘अगस्त्य’ आजबाट नेपालसँगै विश्वभर रिलिजमा आएको छ। 

सौरभ चौधरीको लेखन तथा निर्देशनमा तयार भएको यो फिल्म देशभरका १ सय ११ हलमा रिलिजमा आएको हो । आम दर्शक, फिल्मीकर्मी र प्रदर्शकले समेत आशा गरेको यो फिल्मले बिहानीका केही शोजमा राम्रो सुरुवात गरेको निर्माणपक्षले बताएको छ । 

यो फिल्मको बिहिबार बेलुकी ललितपुरको लाबिम मलमा अवस्थित क्यूएफएक्समा प्रिमियर गरिएको छ । प्रिमियरमा कलाकार, प्राविधिक, पत्रकार तथा विभिन्न क्षेत्रका व्यक्तिहरू पुगेका थिए । 

२ घन्टा ५० मिनेट लामो यो फिल्ममा सौगात मल्ल, नाजिर हुसेन, मलिका महत, प्रमोद अग्रहरी, विजय बराल, रविन्द्र झा लगायतका कलाकारको अभिनय छ । यो फिल्म हेरेपछि अधिकांशले यसको मेकिङ, एक्सन, कथावस्तु भन्ने शैली र कलाकारको अभिनयको खुलेरै तारिफ गरे । 

फिल्म हेर्न पुगेका निर्देशक प्रदीप भट्टराई, नायकहरू सुशील श्रेष्ठ, आर्शीवाद क्षेत्री, कलाकार दिनेश डीसी लगायतले यसको खुलेरै प्रशंसा गरे ।

नेपाली फिल्म क्षेत्रमा नयाँ खालको कथामा उच्च मेकिङमा साथ फिल्म बनेको उनीहरुको भनाई थियो । 


फिल्मीकर्मी र पत्रकारबाट पाएको प्रतिक्रियाले मुख्य कलाकारहरू सौगात मल्ल, नाजिर हुसेन, मलिका महत पनि खुशी देखिए । उनीहरुले, फिल्मको छायांकनका क्रममा गरेको मिहिनेत सार्थक भएको बताए । 

सस्पेन्सले भरिएको यो फिल्ममा छायांकार संजय लामाको काम उत्कृष्ट छ । यस्तै, फिल्मका एक्सन निर्देशक श्री श्रेष्ठले भने गज्जबको काम गरेका छन् । सौगात मल्ल र नाजिर हुसेनको कामले दर्शकलाई प्रभावित बनाउनेछ । यो फिल्मका लागि सौगातले निकै नै मिहिनेत गरेका छन् । 

फिल्मको निर्माणपक्षले ‘अगस्त्य च्याप्टर २’ सन् २०२६ मा रिलिज गर्ने घोषणा पनि गरेको छ ।