नीति शाहः पहिले ‘अनलक्की’, अहिले भ्याई नभ्याई

एउटा पनि फिल्म रिलिज नभएको अवस्थामा नायिका नीति शाहलाई भने भ्याई नभ्याइ छ । ४ वटा फिल्म साइन गरेर पनि निर्माण नभएपछि नीति आफैंपनि दिक्दार भएकी थिइन् । नाम चलेका स्टारहरूसँग फिल्म साइन गरेकी उनले काम नै गर्न पाइनन् । तर, अहिले भने उनको हातमा फिल्म नै फिल्म छ । नीतिले पनि आफूलाई आउँदो बर्ष नै व्यस्त बनाउने तयारी गरेको वुझिएको छ । 

हालै मात्र फिल्म ‘खजुरे ब्रो’को छायांकन सकाएकी नीतिले सविर श्रेष्ठको निर्देशनमा बन्ने फिल्म ‘रुखान’ साइन गरिसकेकी छिन् । यो फिल्ममा उनी विद्रोही महिलाको भूमिकामा देखिदैछिन् । 

नीतिले नायक राज कटुवालसँग जोडी बाँध्ने गरी नयाँ फिल्म साइन गरेकी छिन् । वुझिएअनुसार, सुरुवातमा फिल्मको नाम ‘राजा’ राखिएपनि अहिले परिवर्तन  गरिएको छ । फिल्मको गीतको छायांकन केही दिनमै सुरु गर्ने तयारीमा निर्देशक दिवाकर भट्टराई छन् । अहिले फिल्मका लागि राजले नृत्यको तालिम समेत लिइरहेका छन् । 

नीतिले अर्को एक फिल्म पनि साइन गरेको वुझिएको छ । तर, यसको विषयमा भने निर्माणपक्ष र नीतिको  टिमले आधिकारिक रुपमा केही पनि बताएको छैन । 

नीतिको हातमा ४ वटा फिल्मको लाइन छ । अहिलेसम्म दर्शकले उनको काम हेर्न भने पाएका छैनन् । उनले अभिनय गरेको फिल्म ‘खजुरे ब्रो’ वैशाखको २८ गतेबाट रिलिजमा आउँदैछ । दर्शकले उनको काम यही फिल्मबाट हेर्न पाउनेछन् । 

केही महिना अघिसम्म फिल्म क्षेत्रमा ‘अनलक्की’ भनेर आरोप खेपिरहेकी नीति अहिले मेकरको रोजाइमा अग्रपङ्क्तिमा छिन् ।